طريقه عمل الكحك الناعم والبسكوت

اسهل طريقه لعمل الكحك الناعم والبسكوت في المنزل 

 الكحك الناعم 

المقادير:

كيلو دقيق

معلقه كبيره بيكينج بودر

3 كوب الا ربع سمنة (500 جرام) بدرجة حرارة المطبخ

معلقه كبيرة رائحة كعك

كوب حليب (200 مل) بدرجة حرارة المطبخ

معلقتين كبار سكر بودرة

معلقتين كبار سمسم محمص

طريقة التحضير 

- في بوله كبيرة نخفق السمنة مع السكر البودرة بالمضرب اليدوي لحد ما القوام يبقى كريمي.

- في طبق تاني نخلط الدقيق مع البيكنج بودر والملح والسمسم ورائحة الكحك ونقلبهم كويس مع بعض وننزل بيهم على السمنه ونبدأ نبس ونعجن الخليط كويس جداً لحد ما يبقى شبه الحنة أو الرمل المبلول ودي أهم خطوة وهي اللي بتفرق في نعومة الكحك.

- بعد كده نضيف الحليب ونلم بيه العجين ونعجن براحه لحد ما نحصل على عجينة طرية يمكن تشكيلها وومابتلزقش في الايد.

- نقطع العجينة كرات متساوية ونسيبها ترتاح ربع ساعه وبعدين نحشيها بقطعة صغيرة من العجمية أو الملبن مع البندق أو الجوز ونقفلها كويس ونشكلها في قوالب الكحك او ننقشها بالمنقاش.

- نرص الكحك في الصاجات أو الصواني ونسيب مسافه بين كل واحدة والتانية ويدخل الفرن على درجة حرارة متوسطة 180 لمدة 25-20 دقيقة تقريباً. 

بسكويت بالبرتقال

 

المقادير:
4 كوب كبير دقيق (800 جرام )
كوبين ونصف زبدة بارده (400 جرام)
كوب سكر بودره (200 جرام)
5 بيضات
معلقة صغيرة فانيليا
معلقة صغيرة ملح
معلقة صغيرة بيكينج بودر
بشر برتقاله
كوب عصير برتقال (200 مل)
طريقة التحضير:
- نخفق الزبدة مع السكر لحد ما الخليط يبقى كريمي وبعدين نضيف البيض والفانيليا ونخفقهم مع بعض كويس.
- في طبق كبير او بوله نضيف الدقيق وبشر البرتقاله مع الملح ونخلطهم مع بعض ونضيفهم على الخليط السابق وبعدين نضيف عصير البرتقال ونخفقهم مع بعض لحد ما نحصل على عجينة طرية.
- نشكلها باستخدام كيس الحلواني على هيئة اصابع ونرصها في صينيه مدهونه زيت بسيط وندخلها الفرن على 180 درجه لمدة 25 دقیقة
ملحوظه مهمه: لو هنستخدم ماكينة البسكويت هنزود کوب دقيق على الخليط السابق ولازم ندخل العجينة الثلاجه لمدة نصف ساعه تاخد تبريد بحيث تكون العجينة متماسكة اكتر من اللي بتتقطع بكيس الحلواني.

ياسمين محمد