اسهل طريقه لعمل السينابون والكرواسون في المنزل
السينابون
المقادير:
- كوب حليب دافي.
- نصف كوب سكر.
- بيضتين.
- نصف كوب زبده بدرجة حراره الغرفه.
- 2 معلقه صغيره خميره فوريه.
- رشة بيكنج بودر.
- رشة بيكنج صودا (كربوناتو).
- رشة ملح.
- معلقه صغيره فانيليا سايله او رشة فانيليا بودر.
- 4 كوب دقيق.
طريقة التحضير
- في طبق كبير هنضيف كل المقادير مع بعض ماعدا الدقيق ونخلطهم كويس وبعدين نضيف الدقيق بالتدريج ونعجنهم كويس لحد ما العجينه تلم وماتلزقش في الايد نغطيها ونسيبها تخمر في مكان دافي لمدة ساعه ونصف أو ساعتين.
- نفرد العجينه بالنشابه على رخامه مرشوشه دقيق على شكل مستطيل سُمكه 1 سم تقريباً.
- ندهنها زبده ونبدأ نحشيها والحشو عباره عن كوب سكر بني عليه 4 او 5 معالق كبيره قرفه وممكن تضيفوا نصف معلقة كاكاو او نسكويك.
- نبدأ نلف العجينه بإنتظام وبراحه خالص على شكل رول ونقطعها قطع متساويه بإستخدام خيط تقيل أو سكينه حاميه.
- نبدأ نرص القطع بالطول في صينيه فيها ورق زبده أو مدهونه زبده ولازم نسيب مسافه 2 سم بين كل قطعه والتانيه عشان مايلزقوش في بعض.
- نسيبها تخمر ساعه وندخلها فرن مسخن مسبقاً على درجة حراره 200 لمدة ربع ساعه هنلاحظ ان اللون بقى ذهبي فاتح نطلعها ونسيبها 5 دقايق وبعدين نحط عليها الصوص.
طريقة الصوص
- ربع كوب جبنه كريمي
- معلقه كبيره زبده بدرجة حرارة الغرفه
- كوب وربع سكر بودره
- 4 معالق كبيره حليب
- نصف معلقه صغيره فانيليا
- في بوله كبيره نحط المكونات كلها ونخفقها بإستخدام المضرب الكهربائي لحد ما القوام يبقا تقيل ومتماسك ولو عايزين الصوص خفيف زودوا حليب كل ما كان الحليب اكتر كل ما كان الصوص اخف.
- نحط الصوص على السينابون بعد 5 دقايق من خروجها من الفرن.
كرواسون
المقادير:
- 5 كوبايات دقيق
- 2 كوباية مياه دافيه
- نص كوباية زيت
- ربع كوباية حليب بودره
- 2 معلقه كبيره سكر
- 2 معلقه صغيره خميره فوريه
- رشة ملح
- زبده للفرد
- اي نوع حشو تحبوه
- بيضه مع رشة فانيليا للتلميع
الخطوات والنصايح
- في طبق غويط هنحط كوبايتين دقيق ونضيف الخميره والسكر ورشة الملح والحليب البودره ونخلطهم كويس مع بعض.
- نضيف المياه بالتدريج ونخلطهم تاني لحد ماتتجانس المكونات مع بعضها.
- نغطي العجينه ونسيبها 10 دقايق عشان تخمر.
- بعد ال 10 دقايق نحط الزيت وباقي كمية الدقيق ونعجن العجينه مره كمان لحد ما تبقا طريه و متماسكه.
- نقسم عجينة لكور متوسطة الحجم ونسيبها ترتاح شويه حوالي ٥ دقايق.
- على سطح مرشوش عليه شوية دقيق نفرد كل كوره من العجينه بالنشابه لحد ماتبقا رقيقه وندهنها بالزبده.
- نحط كور العجين فوق بعضها، ولازم ندهن زبده بين كل طبقة والتانيه.
- نفرد كل الطبقات مره كمان بالنشابه لحد ما الطبقه تبقا رقيقه وبعدين نقطعها مثلثات متساوية الحجم.
- نضيف الحشو حسب الرغبه ونلف براحه من رأس المثلث فوق لحد تحت.
- نجيب صينيه ونرص فيها الكرواسون.
- نخفق البيضه مع رشة الفانيليا وندهن بيها الكرواسون ونسيبه نص ساعه يخمر.
- نسخن الفرن على درجة حراره 180.
- ندخل الصينيه الفرن لمدة 20- 25 دقيقه، لحد ما يستوي الكرواسون ويحمر وياخد اللون الدهبي.
عشان الكرواسون ينجح معانا
- الكرواسون من المخبوزات الحساسه للكميات والمعايير في المقادير، فلازم نلتزم بالوصفه بالظبط.
- اهم حاجه لازم نستخدم نوع زبده كويس جداً.
- المياه واللبن لازم يتضافوا دافيين مش باردين ولا سخنين.
- لازم نفرد العجين بالنشابه كويس لحد ما الطبقة تبقا رقيقه.
- لازم العجين يخمر مرتين مره واحنا بنعمله و مره بعد التشكيل.
- يخبز الكرواسون بصواني غير قابله للإلتصاق، ومش هندهن الصواني بأي حاجه قبل مانحط الكرواسون عشان العجين بيكون فيه زبده كفايه تمنعه من انه يلزق في الصينيه.
- لازم نسخن الفرن قبل ماندخل فيه الكرواسون ب 10 دقايق ولازم نحط الصينيه على في منتصف الفرن ونتجنب فتح الفرن اثناء التسوي